Ginkwestyon ni Bacolod City Councilor Wilson “Jun” Gamboa ang wala nagasanto nga mga numero sa presentasyon sang paggamit sang P4.1 billion nga loan sang Benitez Administration.
Nahibaluan nga sa resolusyon sang joint committee sa Sangguniang Panlungsod, ginpresentar nga sa P4.1 billion nga loans ni Bacolod City Rep. Alfredo “Albee” Benitez sang siya pa ang alkalde, P2.4 billion pa lamang ang narelease sang bangko.
Panindugan ni Gamboa nga indi makabig nga valid ang presentasyon bangod ini ang indi gikan kag wala sang pirma sang local finance committee.
Ginakwestyon man sini nga kun ngaa wala ginrelease ang mabilin nga kwarta kag gindelatar ang pila ka mga proyekto, ilabi na nga ini ang progress billing.
Dugang pa niya nga wala nagasanto ang deklarasyon nga P2.4 billion pa lamang ang narelease sang bangko, bangod sa ila nga initial proposed 2027 budget sang Bacolod City, sila ang may utang nga P5.8 billion nga dapat bayaran.
Panindugan niya nga indi man mahimo nga sukton sang bangko ang utang nga wala pa nila narelease.
Ang nasambit nga kwestyon ang ila pa nga diskusyonan sa session subong nga hapon.
