Gin-incorporate na lamang ang pagproseso sang Environmental Compliance Certificate (ECC) para sa Cell No. 4 kag Cell No. 5 sang Bacolod Sanitary Landfill sa Brgy Felisa, Bacolod City.
Madumduman nga gindagdagan sang notice of violation sang Environmental Management Bureau – Negros Island Region ang Bacolod City Government matapos matukiban nga wala sang ECC ang Cell No. 4, samtang indi naman makaproseso sang ECC para sa Cell No. 5 tubtob nga wala pa na-asikaso ang sa Cell No. 4.
Sa interview sang Bombo Radyo Bacolod kay EMB-NIR officer-in-charge Vicente Los Bañes, ginsuhestyon nila nga ma-incorporate na lamang ang pagproseso sang ECC para sa Cell No 4 kag Cell No. 5 agud ini ang matapos antes magtakop ang 2026.
Paathag ni Los Bañes nga ang pag-issue sang notice of violation ang kabahin sa responsibilidad nila nga ipatuman sa mga nagapatigayon sang operasyon apisar nga wala sang ECC, sa diin man nga bahin sang rehiyon.
Sa karun, ang International Solid Waste Integrated Management Specialists, Inc. (ISWIMS) kag Bacolod Environment and Natural Resources Office (BENRO) ang nagaproseso sang ECC para sa Cell No 4 kag 5.
Indi naman derekta nga maulamid sang EMB-NIR sa notice of violation ang IPM Construction and Development Corporation bangod sila ang sa ciudad nakakontrata.
Gani ang City Government lamang ang gin-issuehan, sa baylo ang ciudad na ang dapat nga mag-issue sang penalty sa IPM.
Pahayag ni Los Bañes nga nasolusyonan naman ang iban nga problema kaangay sang water pollution kag reklamo sang pumuluyo sa baho sang basura.
Ang EMB-NIR ang magapatigayon naman sang reorientation sa mga opisyal sang Bacolod, kag information and dissemination campaign angot sa collection kag segregation policy sa basura.
