Nakompleto na sang mga otoridad sang Estados Unidos ang opisyal nga pagproseso sang special immigrant visas (SIV) sang halos 200 ka mga Afghanistan citizens nga yara sa Pilipinas, matapos magsugot ang pungsod nga magserbe nga processing center.
Suno sa senior Philippine government official ang final batch sang Afghan SIV applicants ang nagbiya na sa pungsod sakay sa Philippine Airlines flight antes ang tungang gab-i sang Biyernes.
Sa statement sang US Embassy, dako ang pagpasalamat sang ila nga gobyerno sa gobyerno sang Pilipinas sa kooperasyon kag suporta sa efforts sang Estados Unidos nga ma-assist ang Afghan Special Immigrants.
Kapin 200 Afghan nationals ang nagsulod sa Pilipinas sang Enero 6 para sa final processing sang ila nga visa applications sa US Embassy sa Manila.
Tanan sa mga ini ang nagbiya na sa Pilipinas agud maglupad padulong sa Estados Unidos pinaagi sa commercial flights sang Enero 15 tubtob 17.
Suno sa opisyales sang Pilipinas, one-time deal lamang ang processing of visas sang Estados Unidos sa Pilipinas, para sa mga Afghan nationals.
Nahibaluan nga may pila ka mga opisyales sang pungsod nga nagpabutyag sang pagkahangawa sa security kag iban pa nga concerns sa request sang Estados Unidos apang sa ulihi nagsugot man sa hingyo.
Ang mga applicants ang anay nagatrabaho para sa US forces kag American diplomatic offices sa Afghanistan.
Pahayag sang Philippine kag US officials nga kalakip sa mga Afghan applicants ang madamo nga kabataan, apang wala na ginpatpat ang ila identities.
Ang mga Afghan applicants ang nabiyaan sang US forces sang ginbawi sang Taliban forces ang panggobyerno sang 2021, kun sa diin tuman ang ila kahangawa nga mahimo balusan ang mga nagsuporta sa pwersa sang America.
Sa nasambitan nga arrangement, ang US government ang nagsabat sa gastos sang pagtinir sang mga Afghans sa Pilipinas lakip na ang housing, security, food, medical kag transportation expenses.
