Nagapadayon ang ginapatigayon nga pagrasyon sang tubig sa nagkalain-lain nga mga lugar sa ciudad sang Bacolod partikular na sa mga ka-purokan nga ginakulang sang tubig.
Ang Bacolod City Government ang nagpartner na sa duha ka water companies nga ginalakipan sang Manila Water Company Incorporated kag Manila Water Foundation kasubong man sa pila ka Volunteer Fire Brigades kag iban pa nga mga shareholders, agud mapatigayon ang “Patubig sa Barangay” initiative ni Bacolod City Mayor Alfredo “Albee” Benitez.
Sa interview sang Bombo Radyo Bacolod kay Dr. Laarni Pornan, pinuno sang City Disaster Risk Reduction Management Office, ang makabaton sang rasyon sang tubig ang nakadepende kun may yara sang request.
Suno kay Pornan, may yara sang 17 ka stainless steel nga water tank nga may kapasidad nga 2,000 ka litro ang ginpadala sa Barangay Villamonte, Handumanan kag Mansilingan.
Nagapadayon sa karun ang Patubig sa Barangay sa Barangay 30, Barangay Mansilingan, Barangay Villamonte, Barangay 27, Barangay Handumanan, Barangay Estefania, Barangay 33 kag Barangay Taculing.
Suno kay Pornan, ginabanta nga mga duha ka bulan nga magapadayon ang water rationing ukon mauntat lamang kun may bastante na supply sang tubig kag may yara na sang pag-ulan.
Ang tubig nga ginarasyon ang para lamang sa pagpanghugas kag indi para imnon.
