Ginpalawig pa tubtob sa Hunyo 15 ang pagrasyon sang tubig sa palibot sang Bacolod City nga ginakulang sang tubig.
Sa interview sang Bombo Radyo Bacolod kay Bacolod City Disaster Risk Reduction and Management Office Head Dr. Ma. Laarni Pornan, natalana nga magatakop sa Mayo 31 ang pagpatigayon sang water rationing bangod umpisa na sang tig-ululan.
Apang bangod transition pa lamang sang tig-ululan, nadisisyunan nga padayun ang pagrasyon tubtob sa Hunyo 15.
Nahibaluan nga nagalibot sa nanarisari nga mga kapurokan ang Bacolod City Fire Station, Amity, Philippine Red Cross, Councilor Cindy Ferrer, Prime Water kag ang Manila Waters nga ginakulang sang tubig.
Paathag ni Pornan nga sa Hunyo 15, magapull-out na ang Manila Waters apang tinguhaan nila marequest kun ang mga ini ang makapadayun sa pagsupply sang tubig.
Sa pihak nga bahin pagdangat sa Hunyo 15, ipasa na sa Prime Water ang responsibilidad sa pagrasyon sang tubig sa mga area nga masami wala sang tubig.
Bangod naga-umpisa na ang tig-ululan ginalauman naman suno kay Pornan nga magataas na ang water level sa mga suba.
Panawagan sini sa mga pumuluyo nga likawan ang maghaboy sang basura sa mga water ways, nga mahimo makatuga sang pagbaha kun ini ang magasupon.
