Gin-extend ni Bacolod City Mayor Alfredo “Albee” Benitez ang deadline sang pagparehistro sang mga e-bike kag e-trike sa tagsa ka mga Barangay sang dugang nga isa ka bulan.
Sa madumduman Mayo 24 kuntani ang deadline sa pagparehistro kag magasugod naman ang pagpanakop sa mga indi rehistrado nga mga e-bike kag e-trike nga nagabyahe.
Apang bangod ginadihon pa sang Sangguniang Panlungsod ang guidelines, nag-ayo si Bacolod Traffic Authority Office (BTAO) Head Patrick Leonard Lacson sa alkalde nga mahatagan sang extension.
Bilang sabat, gin-extend sang alkalde sang 30 ka adlaw gani mahimo pa nga mapadayun sang mga Barangay ang pagbatun sang mga luyag marehistro ang ila e-bike kag e-trike units.
Ang mga nalakip sa listahan ang hatagan naman sang control number kag color coded sticker nga mangin pamatuod nga sila ang lehitimo nga makabyahe sa dalanon.
