Gina-ekspektar na sang pinuno sang 303rd Infantry Brigade ang pag-reject sang katapo sang Communist Party of the Philippines–New People’s Army (CPP-NPA) sa ginaduso nga Localized Peace Talk.
Sa interview sang Bombo Radyo kay Colonel Michael Samson, Deputy Commander sang 303rd Infantry Brigade, wala na ini nakibot sa pag-reject sang NPA sa Localized Peace Talk apang luyag sini mabatian ang reaksyon sang pumuluyo angot sa pagreject sang NPA sa gina-offer nga peace engagement sang probinsya.
Suno diri, ini nagapakita nga isa lamang ka puppet sang central committee ang NPA nga indi luyag maresolbar ang problema sa probinsya.
Sa pihak sini, nagapadayon sa gihapon ang panawagan sang militar sa peace engagement kag peace offering sa mga inbidiwal kag magagmay nga grupo sang rebelde nga untaton na ang ginahimo sang mga ini nga pagpatay, pagsunog, pagpangilkil kasubong man ang paghimo sang mga bayolente nga gawi.
Pasalig ni Samson, nga wala naga-untat ang pagtrabaho sang militar sa pag-agom sang katawhayan kag sigurado ini nga tanan ang luyag sang matawhay kag masanyog nga probinsya.
