Gin-isol sa adlaw sang Lunes ang pagresume sang byahe sang mga barko nga nagalayag Bacolod-Iloilo vice versa bisan bwas na nga adlaw magasugod ang general community quarantine sa Negros Occidental kag probinsya sang Iloilo.
Una na nga gin-anunsyar nga magabalik ang byahe bwas kadungan sang pagdowngrade sang ECQ sa GCQ.
Suno kay Commander Jansen Benjamin, pinuno sang Coast Guard Station Negros Occidental, nagkasugot sila sang PCG Station Iloilo nga isanto ang pagresume sang byahe sa duha ka probinsya.
Bangud luyag sang Iloilo City nga sa Mayo 18 nalang maga-resume ang byahe, ini ang pagasundon sang PCG Negros Occidental.
Ginpahayag man ni Benjamin nga ginahulat pa nila ang pag-anunsyar sang Maritime Industry Authority (MARINA) sang ila guidelines tuhoy sa adjustment sang plete sa barko.
Suno diri, maga-apela sila sa MARINA bangud ang nasambit nga ahensya ang nakatalana nga magregulate sang plete sa barko.
Suno sa iya, magahulat lang sila sang anunsyo tuhoy diri antes nila ini ipatuman.
Gindugang man sang pinuno nga kun magbakal sang ticket, kinahanglan na lang sang identification card kag kuhaan ini sang body temperature.
Kun may sintomas ang isa ka pasahero, suno kay Benjamin, irefer ini sa health medical worker on board agud macheck kag mamonitor ang temperatura sang pasahero.
