All set na ang pagresume sang plebisito nga magadeterminar kun madayon ang Joint Venture Agreement sa tunga sang Central Negros Electric Cooperative kag PrimElectric Power ukon indi.
Sa interview sang Bombo Radyo kay CENECO acting general manager Atty. Arnel Lapore, ginahanda na sa karon ang mga eskwelahan nga gamiton bilang polling centers, mga ballot boxes, kag ang balota nga sulatan sang mga member-consumers nga magaboto.
Ang plebisito ang patigayunon sa Agusto 19 kag 20, Agusto 26 kag 27 kag Setyembre 2 kag 3.
Santo sa final nga masterlist suno kay Lapore, masobra 177, 000 ang final nga kadamuon sang member-consumers nga makaboto sa pagresume sang plebisito.
Suno kay Lapore, 88,000 ka boto nga YES ang kinahanglan agud nga madayon ang Joint Venture Agreement.
Nalakip naman sa 177,000 ang malapit 26,000 nga una na nga nagboto nga YES samtang 6,000 naman ang nagboto nga NO.
Optimistic naman ang CENECO nga malab-ot ang required number of votes agud nga magdaog ang YES bangud madamo ang mas nakaintindi na kadungan sang ricorida kag education and information campaign nga ginapatigayon.
Nagpanawagan naman ini sa tanan nga mga konsumidor nga may mga bills nga sarang gid matsekyar sa barangay ang masterlist kun ari diri ang ila ngalan, kag iga-exercise ang kinamatarong nga magboto.
