Gin-athag sang Provincial Veterinarian sa Negros Occidental nga normal na ang pagtaas sang presyo sang baboy sa first quarter sang tagsa ka tuig.
Suno kay Dr Placida Lemana, kulang pa sa binulan ang mga ginasagod nga baboy sa karun kag indi pa maihaw.
Suno diri dako ang demand sa baboy sang Oktubre tubtob Disyembre kag kalabanan sa mga ginsagod nga baboy ang gintalana nga maihaw para sa holiday season.
Paathag ni Lemana nga sa ila data, halos kada tuig nagasaka ang presyo sang baboy sa first quarter ukon Enero tubtob Abril.
Bangod dutay ang supply, nagasaka man ang presyo.
Apang nakadepende naman sa lugar ang presyuhanay.
Sa ila record, ang may pinakamataas nga presyo amo ang San Carlos City kag banwa sang Cauayan nga nagadangat sa P380 samtang ang pinakamanubo ang mabakal sa banwa sang Salvador Benedicto kag Toboso nga yara lamang sa P280.
