BACOLOD CITY – Lauman ang pagsaka sang bili sang kuryente samtang nagahilapit ang bulan sang tig-ilinit.
Ini ang pahayag ni Central Negros Electric Cooperative (CENECO) General Manager Sulpico “Jun” Lagarde.
Suno kay Lagarde, mangin tunaan man sang pagsaka sang presyo sang kuryente amo ang pag shutdown sang Malampaya power plant sa Luzon tinalikdan nga Enero 29 kun sa diin 600 mega watts ang nadula sa suplay sini.
Paathag ni Lagarde, bangud sang kakulang sang suplay sang kuryente sa Luzon mahimo nga suyupon ang sobra nga suplay sa Visayas pinaagi sa mga sub-marine cables.
Suno sa CENECO general manager, kun sa gab-i kulangon ang suplay sa luzon kag wala sang solar power maapektuhan ang serbisyo sang ceneco sa mga kunsumidor sini.
Sa karun yara sa P9.92 kada kilo watt hours ang presyo sang kuyente sang Central Negros Electric Cooperative.
Samtang, naga panugyan si Lagarde sa mga kunsumidor nga magkinot sa pag gamit sang kuryente kag gabuton sa saksakan ang mga appliances nga wala gina gamit agod indi magtaas ang demand ilabi na kun tig-ilinit.
