Posible nga magasanyog ang ekonomiya sang Pilipinas sa 6 percent sa second quarter sang tuig, suno sa isa ka eksperto.
Suno kay Rizal Commercial Banking Corporation chief economist Michael Ricafort, ang nagaduso sang pagsanyog sang ekonomiya ang ginakalakipan sang mas mataas nga paggasto sang mga consumer kag gobyerno.
Suno diri, ang mas madasig nga paggastos sang gobyerno ang ginpangunahan sang padayon nga pagdamo sang infrastructure spending, subong man sang mga preparasyon para sa May 2025 midterm elections bangud ginapadasig sang mga ahensiya sang gobyerno ang pagpatuman sang mga proyekto ukon programa antes ang election ban.
Samtang ang official second quarter Philippine economic growth data ang ipagwa sang Philippine Statistics Authority (PSA) sa masunod nga semana.
Sa first quarter sang tuig, ang ekonomiya sang Pilipinas ang naganyog sang 5.7 percent.
Suno kay Ricafort, ang pagsanyog sang ekonomiya sang pungsod malapit sa 6 percent levels ang mahimo nga malab-ot sa mga masunod nga quarters bangud sa manami nga demographics kag padayon nga pagbangon sang pila ka industriya kasubong sang turismo.
Dugang pa sini ang iban nga nagaduso sang pag-uswag amo ang padayon nga pagsanyog sa business process outsourcing (BPO) nga nakakolekta sang masobra USD35 billion sadtong 2023 kag ginalauman nga magasanyog pa sa USD39 billion sa 2024 kag mas mataas pa sa mga maabot nga tuig.
