Ginalantaw nga ang pagsaway sa parkingan ang isa sa mga motibo sa pagluthang-patay sang isa ka security guard sa 23rd Street, Barangay 5, Bacolod City alas 10:45 kagab-i.
Ang biktima ang ginkilala nga si Security Guard Jofen Dequito, 42 anyos kag residente sa Hacienda Bernabe 2, Barangay Salvacion sa banwa sang Murcia kag empleyado sang iWatch agency.
Sa interview sang Bombo Radyo kay Police Captain Jonito Pastrana, station commander sang Bacolod Police Station 2, nagikan sa east nga direksyon ang tatlo ka mga persona nga nagasakay sa duha ka motorsiklo sang magapark ini kuntani sa kilid sang establishmento sa nasambit nga lugar.
Suno kay Pastrana, sila ang ginsita sang security guard sa maayo nga pamaagi nga sa pihak sila dapat mapark.
Nagsaylo ang mga ini apang daw may suya ang ila panulok sa gwardiya.
Kapin duha ka oras nga nagtinir sa sulod sang establishmento ang tatlo kag nagwa pagka-alas 10:30 sang gab-i.
Nag-una na halin sa lugar ang duha ka persona nga naga-angkasanay sa motorsiklo samtang nagpabilin naman ang isa bangud iya ginhulat ang gwardiya.
Sa iya ini nakit-an, iya ginturusok ang security guard nga nagatalikod, gintayaan sang pusil sa ulo kag ginluthang.
Pagkatapos sang insidente, iya pa ginkuha ang pusil sang gwardiya kag gindala sa pagpalagyo.
Suno kay Pastrana, posible nga nasuya ang mga suspetsado sa pagsita sa ila sang gwardiya ukon gin-interesan sini ang armas sang biktima.
Nakit-an sa crime scene ang empty shell sang calibre .45 pistol, mga identification cards kag cellphone ni Dequito.
