Wala nadayun kaina sang aga ang pagsaylo kuntani sang water pipe nga yara sa tunga sang Bakyas Bridge sa Barangay Mansilingan.
Madumduman nga madugay na nga ginapanawagan ang pagkakas sang water pipe matapos magpabilin sa tunga sang dalan sang ginpatigayon ang road widening program, bangod ini ang nagahatag sang alarma sa mga motorista.
Nalawigan naman ang proseso bangod sa indi paghangpanay sa tunga sang Bacolod City Water District – PrimeWater kag Department of Public Works and Highways, kun sa diin wala gintugotan nga matakod ang water pipe sa taytay.
Gani naghuman sang separado nga platform ang BACIWA-PrimeWater kag sanfo sa advisory, alas-8:00 sang aga kuntani ang umpisa sang pagsaylo.
Apang wala nadayun nga masaylo sang aga ang tubo bangod sa gina-alegar ginkawat ang pila ka mga materyales kag equipment sang contractor.
Gintinguhaan naman nga makadul-ong sang kulang nga materyales kag equipment agud madayun ang proyekto sa labing madali nga panahon.
Samtang wala pa, abiso sang BACIWA-PrimeWater sa mga maapektuhan nga Barangay nga magtipon na sang tubig.
