SA SINGAPORE… Indi maayo mabatyagan ang Semana Santa sa Singapore bangud kalabanan sa mga pumuluyo ang Buddhist kag Muslim.
Suno kay Bombo International Correspondent Welyn Pallorina direkta sa Singapore, ang mga Katoliko ang nagapadulong sa simbahan kun Semana Santa apang indi kaangay sa Pilipinas, wala sang prosesyon kag wala man sang taltal.
Suno sa iya, madamo man sang simbahan nga Katoliko sa Singapore kag nagapadulong lamang didto ang mga Filipino pagkatapos sang ila trabaho.
May trabaho pa subong nga adlaw bangud sa Biyernes pa magasugod ang public holiday, kun sa diin sila ang magapadulong sa Novena Church.
Wala naman sang lubi sa Singapore gani lain nga tanom kag may tunok-tunok ang ila ginahimo nga lukay para sa Palm Sunday.
Kun Easter Sunday, nagapadulong ang mga ini sa mga beach, may mga nagahatag sang chocolates, marshamallows kag nagapatigayon man sila sang Easter Egg hunt.
SAMTANG SA ABU DHABI… Kaangay man sa Pilipinas ang selebrasyon sang Semana Santa sa Abu Dhabi.
Suno kay Bombo International Correspondent Diane Manalo direkta sa Abu Dhabi, madamo sang relihiyon sa pungsod kag madamo man sang Katoliko.
Suno sa iya, kaangay sa Pilipinas, may yara man sila sang Siete Palabras, may prosesyon, Visita Iglesia apang wala lamang sang taltal.
Suno diri, sa sulod sang simbahan lamang sila nagaselebrar sini bangud ginadumilian ang pagpatigayon sini sagwa kasubong ang pagsuksok sang bayo nga may cross.
Ginahatagan naman sang holiday kun Huwebes Santo kag Biyernes Santo ang mga Kristiyano sa pungsod.
Suno kay Manalo, madamo sang mga overseas Filipino workers (OFW) sa Abu Dhabi kag kapin 1,000 naman ang Katoliko.
SA UNITED KINGDOM… Gamay lamang ang populasyon nga naga-obserbar sang Semana Santa sa United Kingdom.
Suno kay Bombo International Correspondent Ramil Isogon, derekta sa United Kingdom, 8.7 percent lamang gikan sa 67 million nga populasyon sa England ang katoliko.
Pinakamadamo suno diri amo ang mga atheist nga yara sa 52 porsyento, ukon ang populasyon nga mas nagapati sa siyensya sangsa bibliya.
Samtang ang Church of England, nga gintukod sang royal family ang yara naman sa 13 porsyento.
Nagadangat naman sa 13.2 percent ang populasyon sang nanarisari nga Christian faiths kag anom tubtob pito ka porsyento ang Islam.
Sa pihak nga bahin, highlight naman sang Semana Santa sa England ang Domingo kun sa diin antes ang misa, sila ang may ginapatigayon nga prosesyon.
Apang ang mga tumalambong ang dyutay lamang indi kaangay sa mga tumalambong sa Pilipinas.
Kasunod sang misa may-ara naman sang Easter Egg hunting sa compound sang simbahan kag may isa ka lugar kun sa diin sila ang nagatipon agud magkaon.
Ang Domingo de Gloria man ang tion nga nagatipon-tipon ang mga Pilipino sa England kun sa diin sa masami ang specialty nga ila ginaluto amo ang Barbeque.
Dugang pa ni Isogon nga may duha ka adlaw man nga public holiday sa England may kaangtanan sa Semana Santa nga ginatawag Bank Holiday.
Ang bank holiday ang ginapatigayon kada Good Friday kag Easter Monday kun sa diin double pay ang sweldo sang mga magatrabaho.
Suno kay Isogon, kalabanan sa mga English ang ginapili nga magtrabaho bangod wala man sila naga-obserbar sang Semana Santa.
