Mangin mandatory na sa mga pampubliko nga lugar sa ciudad sang Bacolod ang pagsuksok sang face shield.
Suno kay Vice Mayor El Cid Familiaran, ginpasar na sang Sangguniang Panlungsod sang Bacolod ang City Ordinance No. 944 nga nagamando sang pagsuksok sang face shield sa pila ka mga lugar sa ciudad kag ginpirmahan ni Mayor Evelio Leonardia.
Napasar ang CO 944 ukon ang “Face Mask, Face Shield, and Social Ordinance of Bacolod City” sa SP sadtong Oktubre 28 kag gin-aprubahan naman ni Bacolod City Mayor Evelio “Bing” Leonardia sang Nobyembre 3 nga nagamyenda sa section 1,2,3 kag 6 sang City Ordinance No. 926 series of 2020 ukon ang ordinansa nga nagarequire sa mandatory nga pagsuksok sang facemask kag pag-obserbar sang social distancing sa tanan nga pampubliko nga lugar sa Bacolod.
Sa Section 3 sang CO 944, nakabutang nga tanan nga persona nga yara sa pampubliko nga lugar ang required nga magsuksok sang facemask kasubong man nga gina-require ini sa mga yara sa sulod sang mga pampubliko ukon pribado man nga mga salakyan kaupod na ang mga yara sa sulod sang mga pribado nga opisina kun sa diin ginapahanugutan ang publiko.
Kadungan sang mandatory nga pagsuksok sang facemask, ang face shield ang mandatory man sa pagsulod sa supermarkets, public markets, malls, venues para sa mga meetings (government man ukon pribado); mga lugar nga ginapatigayunan sang private ukon government services; enclosed nga mga opisina ukon establishimento kag pampubliko nga transportasyon.
Tanan naman ang ginamanduan nga mag-obserbar sang social distancing sa mga pampubliko nga lugar, pampubliko ukon pribado nga salakyan, kasubong man sa mga pribado nga lugar kun sa diin ginapahanugutan man ang mga publiko sa pagsulod.
Samtang nakabutang naman sa Section 4 nga ang mga persona nga wala nakasuksok sang nagakaigo nga facemask kag faceshield kasubong man ang mandato nga social distancing ang may penalidad nga P200 ukon walo ka oras nga community services sa kada bayolasyon.
Ang community service ang igasupervise sang City Health Office kaupod sa koordinasyon sang Barangay kun sa diin nagapuyo ang nagbayolar.
Kun indi naman residente sa ciudad sang Bacolod, yara naman sa P300 ang mangin penalidad.
