Gin-athag sang provincial election supervisor sa Negros Occidental nga wala ginadumilian ang pagsuksok sang mga panapton nga kaangay sang kolor sang isa ka politiko ukon political party partikular na sa Mayo 8 kag sa Mayo 9 ukon sa Election Day apang dapat wala sang signs, pangalan ukon plataporma sang kandidato.
Nahibaluan nga ginadumilian na ang pagpangampanya antes ang adlaw sang eleksyon kasubong man mismo sa Election Day.
Sa interview sang Bombo Radyo Bacolod kay Atty Roberto Salazar, ang pagpatigayon sang pagpangampanya sa nasambit nga mga adlaw ang indi makabig nga premature campaigning bangod campaign period na, apang ini ang makabig nga illegal campaigning.
Suno diri kun ang mga botante ang pagsuksok sang panapton nga may ensinya, pangalan ukon logo sang kandidato bisan pa ini bilang kabahin sang personal expression ini ang makabig na nga pagpangampanya.
Pasalig man sang Election Supervisor nga wala sang mga ini ginapunggan ang mga botante sa kun sin-o ang luyag nga botohun bangod ila ini kinamatarong.
Apang ginapanugyan sang mga ini nga kun mahimo likawan nalang ang mga kolor sang panapton nga nagarepresentar sang kandidato ukon partido.
Aminado naman ini nga wala sang kaso kun random lang ang pagsuksok sang kolor sang panapton apang indi na maayo kun makita nga nagagrupo ukon ululupod ang mga magkaangay ang duag sang bayo kag makabig na ini nga pagpangampanya.
