Ginmanduan sang Police Regional Office Negros Island Region ang Bacolod City Police Office nga likawan ang pagsuksok sang operatiba sang anuman nga uniporme sang kompaniya sa pagpatigayon sa anti-drug operation.
Ini kasunod sa paggamit sang isa ka operative sang uniporme sang delivery rider sa ginpatigayon nga drug buy-bust operation sang Bacolod Police Station 10 sa Purok Santo Niño, Brgy Handumanan sang Nobyembre 7.
Suno kay BCPO Director Police Col Eugene Rebadomia, nagmando na siya sa tanan nga drug operative nga likawan ang pagsuksok sang bisan ano nga uniprme bangud sa security concerns sang pila ka mga kumpanya.
Suno kay Rebadomia, indi intensyon sang drug operative nga magsuksok sang uniporme sang isa ka delivery rider kag wala man ini nagpakilala nga delivery rider.
Makighun-anon man siya sa amo nga kumpanya agud maklaro ang natabo nga issue.
Samtang, nagpaggwa naman sang Press Statement ang PRO NIR kahapon.
Suno sa PRO NIR, ginakilala sang kapulisan nga ang amo nga insidente ang maghimo magbutang sa katalagman sa seguridad kag pangalabuhian sang isa ka delivery rider.
Ginpasiguro sang kapulisan nga magapadayon ang kampanya kontra ilegal nga droga, apang dapat ini nga ipatuman nga may propesyonalismo, responsibilidad, kag pagrespeto sa seguridad kag kinamatarong sang mga pumuluyo.
Nagpasalig man ang PRO NIR nga usisaon ang insidente kag palig-unon ang mga patakaran agud malikawan nga madalahig ang mga delivery riders sa ila operasyon…Samtang, nagapasalamat ang mga riders sa Maxim Rides and Food Delivery sa madasig nga sabat sang kapulisan sa ila complaints angot sa paggamit sang ila uniporme sang kapulisan nga nagpatigayon sang drug buybust operation sa Brgy Handumanan, Bacolod City sang Nobyembre 7.
Sa interview sang Bombo Radyo Bacolod kay Bacolod Maxim Riders President Roberto Baclaan, naalarma ang mga kaupdanan nila matapos maggwa ang litrato nga nagasuksok sang ila uniporme ang pulis nga nagdakop sa mga nagabaligya sang illegal nga droga.
Gani ini ang gilayon niya nga ginreport sa ila management, nga mahimo amo ang nagpadala sang formal complaint sa Bacolod City Police Office (BCPO).
Bangod masami nga nagadeliver, kag kun kis-a sa mga suludlon pa nga lugar, ginakahangawa nila nga sila ang dumtan ukon masal-an nga operatiba kun ginagamit sang mga pulis ang ila uniform kun may dalakpon.
Aminado si Baclaan nga indi mapaktan ang pinsar sang mga durugista kag ini ang indi lahog-lahog nga concern para sa ila.
Madumduman nga ginmando na ni BCPO Director Police Col Eugene Rebadomia sa mga kapulisan nga indi na maggamit sang uniform sang mga kompanya kalakip na ang mga delivery riders sa mga anti-illegal drugs campaign.
