Sumugod kaina sang aga, ginpahanugutan na nga liwat makabalik ang mga mangunguma sa sulod sang 6km extended danger zone sang Bulkan Kanlaon.
Madumduman nga gindumilian sang nakaligad nga semana ang pagsulod sa area bangod sa mga nakita nga palatandaan sang posibilidad sang mga pag-alburuto.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, nagpagwa na sang memorandum ang Regional Task Force sa pagbukas sang border sa mga mangunguma halin alas-6:00 kaina sang aga.
Apang sa karun, mas ginhugtan ang pagsulundan kag mga amay sang panimalay lamang ang ginapahanugutan nga makasulod.
Ini matapos nga makabatun sang report ang OCD nga sa tinalikdan nga pagpasulod, madamo sang mga amay nga ginadala ang ila asawa kag kabataan.
Gindumilian sang tinalikdan ang pagsulod bangod namonitor ang mas nagadamo nga volcanic earthquake kag manubo nga gas emission.
Apisar nga halos kasubong gihapon ang records, ginbuksan na ang border bangod isa ka semana naman ang nagligad, kag wala na na-atinder ag mga ka-umahan.
Nagapangaman ang OCD nga sa posibilidad sang pag-alburuto sang bulkan, mas madasig nga makaluwas ang amay kun wala ini sang gina-ulikdan pa nga bata kag asawa.// Ang pagbisita, ang agud ma-amuma ang mga kasapatan, pananom ukon makaharvest.
Kasubong gihapon nga alas-6:00 sang aga tubtob alas-4:00 sang hapon ang window hours sa pagbisita.
Apang hugot na nila nga ginpa-alinton sa mga border control nga seguruhon nga amay lamang ang makasulod.
Hugot man nga ginapatuman ang time-in, time-out logbook, sa evacuation centers kasubong man sa border control.
