Doble ang effort sang mga kapulisan kag alkalde sa ciudad sang Bacolod agud nga indi makasulod ang illegal nga druga ilabi na nga ginaselebrar sa karun ang Masskara Festival.
Nahibaluan nga masobra sa P6 million nga balor sang illegal nga druga ang nakumpiskar sang mga otoridad sa ciudad sang Bacolod sa tatlo ka magkatuhay nga drug buybust operations.
Suno kay Bacolod City Mayor Alfredo Benitez, antes pa man ang bulan sang Oktubre ginmanduan na sini ang City Director sang Bacolod City Police Office nga bantayan ang pagsulod sang illegal nga druga sa ciudad.
Suno kay Benitez, daw kaangay nga peak season sang mga naga-engage sa transaction sang illegal nga druga ang bulan sang Oktubre.
Bangud sini nagmando na ini sa mga law enforcement agencies ilabi na sa mga kapulisan nga magbantay bangud ang selebrasyon sang Masskara Festival ang kuhaon nga tyansa sang mga naga-engage sa illegal transactions agud nga makabaligya.
Nagapabilin man nga dako nga palamangkutanon kun sa diin nagahalin ang supply sang illegal nga druga bangud daw halos kada adlaw may ginapatigayon man nga police operations batok sa mga ini.
