Pagadumilian ang pagsulod sang mga turista kag non-essential travel sa Sipalay City, Negros Occidental halin Agosto 14 tubtob Agosto 31, 2020.
Sa interview sang Bombo Radyo kay Keith Cari-an, public information officer sang Sipalay City, ginkumpirmar sini nga nagpagwa sang executive order 2020-033 ang alkalde sang ciudad nga nagapatuman sang moratorium ban sa mga tourism related kag non-essential travel sa Sipalay.
Suno kay Cari-an, ang mga lokal nga residente ang sarang nga makakadto sa mga resorts apang ang mga turista ang dumilian anay sa pagsulod sa ciudad subong mana ang mga magabisita sa ila pamilya bangud ginakabig ini nga non-essential.
Suno sa iya, pahanugutan lang ang mga medical related transactions, business related, government related kang delivery sang mga goods kag items.
Exempted man diri ang mga residente sang mga ciudad kag banwa nga indi high risk sa COVID-19 kag sa Sipalay naga-ubra.
Ginpahanugutan man nga makabyahe ang mga taga Sipalay nga naga-ubra sa sagwa sang ciudad apat dapat indi high risk ang lugar nga nahamtangan sang ila ulubrahan.
Wala naman sang problema, suno sa PIO, ang paglabay sang mg mga nagabyahe nga bus padulong sa Hinobaan apang sa mga pribado nga salakyan, kinahanglan nga magsulat ini sa logbook sa boundary sang Cauayan-Sipalay kag pagkatapos ang pila ka oras, tsekyarun sang otoridad kun nakalabay ang pribado nga salakyan sang boundary sang Sipalay-Hinobaan agud masiguro nga wala ini nagpabilin sa ciudad.
Suno kay Cari-an, ini agud macontrol ang paglapta sang virus bangud nahibaluan nga 14 na ka mga barangay ang may kaso sang local transmission.
