Ginarespeto sang ciudad sang Bacolod ang pagpaidalom sa ciudad sang Iloilo sa modified enhanced community quarantine (MECQ) nga nagresulta sa suspensyon sang byahe sang barko epektibo Mayo 25 sang kaagahon.
Sa interview sang Bombo Radyo kay Bacolod City Vice Mayor El Cid Familiaran, indi maintrahan sang Bacolod ang desisyon sang ciudad sang Iloilo bangud natun-an nila ini antes naghingyo nga ipaidalom sa modified enhanced community quarantine.
Ang ciudad sang Bacolod naman suno sa bise alkalde ang wala nagakinahanglan nga magpatuman sang border closure bangud isa na ka tuig ang pag-atubang sa COVID-19 kun sa diin madamo na ang leksyon nga natun-an.
Suno diri, nagsaka ang COVID cases bangud ginaagwanta sang mga residente bisan may yara na sang sintomas gani nagdamo ang nalatnan.
Panugyan sang bise alkalde, gilayon nga magpaidalom sa swab test kag mag-isolate kun may nabatyagan nga sintomas agud nga indi malatnan ang kaupod sa balay.
Ang away batok sa COVID suno sa chairman sang local inter-agency task force ang giyera kag indi hampang gani indi pag-isalig sa iban ang kaluwasan.
