Gin-athag sang pinuno sang Coast Guard Station Negros Occidental nga indi tanan nga Negrense nga nastranded sa Tabuelan Port sa Cebu ang makatabok gilayon sa probinsya paagi sa Escalante City port.
Nahibaluan nga sang tinalikdan nga semana, ginkakas na sang alkalde sang Tabuelan ang travel restriction kun sa diin ginpahanugutan na ang mga Negrense nga makatabok matapos ang pila ka adlaw nga pagkastranded.
Sa interview sang Bombo Radyo kay Commander Jansen Benjamin, gin-athag sini nga makatabok sa Escalante ang mga LSI kun may yara sang bakante sa quarantine center sa Cadiz City.
Suno kay Benjamin, may yara sang koordinasyon ang provincial government sang Negros Occidental kag ang team nga in-charge sa Tabuelan Port agud nga makahatag sang go signal nga sarang na makapasakay sang pasahero base sa numero sang bakante nga balay sa Cadiz quarantine center.
Ang LSI ang dapat naman nga magpakita sang medical certificate kag travel authority nagikan sa place of origin.
Ang Tabuelan Port suno kay Benjamin ang nagagamit sang first come, first served basis sa pagpasakay sa mga LSI.
Kadungan sini, ginpanginwala man ni Benjamin ang nagalapta nga impormasyon sa social media nga may gahom ang PCG sa pagpapauli sa mga LSI nga nagadungka sa Bacolod kag Negros Occidental ports.
Suno kay Benjamin, ang mga LSI nga taga-Bacolod ukon taga-Negros Occidental ang ginadala sa quarantine center agud mapaidalom sa swab testing antes sila sugaton sang ila LGU.
Naghingyo man ini sa mga LSI nga indi magpalagyo pag-abot sa pantalan bangud tuman sila kadamo kun kaisa nga indi matatapan sang nagatransport nga PCG personnel.
