Nagdangat na sa masobra 2 mil ang kaso sang coronavirus disease 2019 sa Western Visayas matapos madugangan sang 115 ka mga bag-o nga infections kahapon.
Santo sa Department of Health Region 6 Case Bulletin No. 135, nagapanguna ang Iloilo City sa may pinakamadamo nga narekord nga bag-o nga kaso nga nagadangat sa 69.
Ginasundan ini sAng Negros Occidental nga may 28; Bacolod City nga may 10; Iloilo province nga may 7 kag Aklan nga isa ka kaso.
Sa kabug-usan may yara na sang 2,046 ka mga kaso sang COVID-19 sa Region 6.
Sa mga bag-o nga kaso sa Negros Occidental, 27 diri ang mga returning overseas Filipino workers samtang isa ang locally stranded individual.
Lunsay mga local ukon indigenious cases naman ang napulo nga nagpositibo sa Bacolod City.
37 ang nadugang nga recoveries sa Region 6 kun sa diin 19 ang nagikan sa probinsya sang Negros Occidental.
Sa karun ang Bacolod City ang nakarecord na sang kabug-usan nga 378 ka mga kaso sang COVID-19 samtang nagdangat naman sa 655 ang kaso sa probinsya.
Sa pihak nga bahin, gin-anunsyar man kahapon ni Bacolod City Mayor Evelio Leonardia nga suspendido naman ang trip sang mga pasahero nga nagalabay sa Dumangas Port patabok sa Bacolod.
Suno sa alkalde, ini ang sabat ukon reciprocation sa Executive Order ni Iloilo Provincial Governor Arthur Defensor Jr. nga siraduhon ang pantalan para sa mga pasahero nga nagikan sa Bacolod kag Negros Occidental.
Bangud sini, essential goods na gid lamang ang sarang makarga sa mga roro vessels.
Nagalaom naman ang alkalde nga maintindihan sang mga Bacoleño ang suspension of trips para sa mga pasahero.
