Ginapakamaayo sang tagpamaba sang Prime Electric Holdings Inc. nga malapit na lamang kag mahatagan na sang prangkisa ang Negros Electric and Power Corporation (NEPC).
Ini matapos nga napasar na sa Kamara ang House Bill 9805 ukon ang hagna nga magahatag sang franchise sa NEPC kag ini ang gin-adoptar naman sa Senado kahapon.
Sa interview sang Bombo Radyo Bacolod kay Jonathan Cabrera, ini ang manami nga milestone apang wala man nagakahulugan nga sila ang makatake-over na gilayon.
Apisar nga 22 gikan sa 24 ka mga Senador ang nagboto pabor sa hagna, ini ang magalabay pa sa bicameral conference sang duha ka Houses of Congress.
Suno kay Cabrera sa period of interpellation sang Senado, gamay lamang ang ginrekomendar nga amendments kag sa tion nga maplantsa na sang bicameral committee, ang doumento ang ipasaka na sa Office of the Presidente.
Mahimo nga primahan ni President Ferdinand “Bongbong” Marcos Jr. ang hagna agud mangin layi; mahimo man nga ini ang indi sapakon kag makaligad sang 30 ka adlaw ini ang automatic naman nga mangin layi kag sarang man sang Presidente nga i-veto ang hagna.
Kun ma-aprubahan, ipublish pa sa official gazette ang desisyon sa sulod sang 15 ka adlaw antes maka-take effect bilang layi.
Ini ang gamiton man nga attachment sa pag-apply nila sang certificate of public convenience and necessity (CPCN) sa Energy Regulatory Commission (ERC).
Ang ahensya ang magapatigayon naman sang mga public hearings, nga ginalauman ni Cabrera nga indi man tuman ka lawig.
Kasunod sini sila ang makaschedule na para sa opisyal nga take-over, nga mahimo mapatuman makaligad sang tatlo tubtob apat ka bulan.
