Ginkumpirmar sang Provincial Health Officer sa probinsya sang Negros Occidental ang pagtaliwan sang siyam ka bulan nga lapsag nga lalaki matapos nga nagsuprer sang balatian samtang yara sa sulod sang evacuation center sang mga evacuees sang paglupok sang bulkan Kanlaon.
Suno kay Dr. Girlie Pinongan, ang lapsag nga residente sang Brgy Cabagnaan, La Castellana ang ginapa-examine sa doktor kag natukiban nga nagasuprer sang severe dehydration.
Siya ang ginrefer sa ospital sang Enero 25 apang nagtaliwan sa amo nga adlaw bangod sa Sepsis secondary to community-acquired pneumonia.
Ini na sa karun ang ikaduha nga lapsag nga napatay samtang nagatinir sa evacuation center.
Sang Disyembre, tinalikdan nga tuig may isa man ka lapsag nga lalaki ang nagtaliwan bangod sa Acute gastroenteritis with severe dehydration.
