Ginatun-an sang alkalde sa ciudad sang Bacolod ang posibilidad sang pagterminate sang joint venture agreement sa tunga sang Primewater kag BACIWA.
Sa press conference ni Bacolod City Mayor Alfredo “Albee” Benitez, ginpahayag sini nga mangayo siya sa BACIWA sang listahan sang mga bayolasyon sang Primewater sa ila nga kontrata bangud santo sa section 5.1.2 sang kontrata, nakasaad nga sa sulod sang lima ka tuig halin 2020, dapat masiguro ang 24 oras nga tubod sang tubig apang tubtob sa karun wala ini macomply sang nasambit nga water concessionaire.
Ginpamangkot man sang alkalde sa BACIWA kun ano ang nahimo sini sa paglapas sang Primewater sa nakasaad sa kontrata kag kun bala may yara na ini sang ginpanaog nga penalidad batok sa water concessionaire.
Ginapapasa man ang BACIWA sang ila nga water security plan nga indi lamang sabat sa El Niño phenomenon kundi mahatagan sang solusyon ang problema sa supply sang tubig sa ciudad.
Suno kay Benitez, naga-claim ang BACIWA nga 90 million liters a day (MLD) lamang ang kinahanglan sang Bacolod apang 125 MLD ang ginarekomendar sang mga eksperto para sa ciudad matapos ang ginpatigayon nga verification.
Dismayado man ang alkalde bangud may yara sang mga nakita nga post sa social media sang malubog nga tubig.
Suno pa sa alkalde bangud amo na ini ang tubig nga naga gwa sa gripo nagakinahanglan na ini nga islan ang daan nga mga tubo.
Ginpahayag pa sini nga kun mag-ilis sang tubo dapat may yara sang investments.
Dugang pa sang alkalde nga wala sang concrete investment ang Primewater para mapaayo ang ila serbisyo matapos ang apat ka tuig.
