Nagapati si former Iloilo 5th District Congressman Niel “Junjun” Tupas Jr. nga wala nakabulig sa prosecution ang pagpresentar kay National Bureau of Investigation (NBI) Director Melvin Matibag bilang testigo sa nagapadayon nga impeachment trial batok kay Vice President Sara Duterte.
Sa interview sang Bombo Radyo kay Tupas, lead House prosecutor sa Corona impeachment, ginpahayag sini nga wala sang bag-o sa testimonya ni Matibag bangud ang tanan sini nga ginpresentar ang nahibaluan na sang tanan.
Para sa anay Congressman, nakapuntos ang depensa sa ikawalo nga adlaw sang impeachment trial bangud napakita sang grupo sa idalom sang cross examination nga wala sang personal nga ihibalo si Matibag sa nagakatabo.
Ini bangud indi pa si Matibag ang nagapungko bilang NBI Director sang natabo ang gina-alegar grave threat sang Bise Presidente kay President Ferdinand Marcos Jr., First Lady Liza Marcos kag former House Speaker Martin Romualdez.
Dugang pa sini, napakita man sang depensa nga may partiality si Matibag bangud sa pagkalakip sang iya asawa nga isa sa mga nagpabor sa impeachment ni VP Sara.
