Kadungan sang postponement sang 2020 Western Visayas Regional Athletic Association Meet, wala man gina-engganyo sang Department of Education ang pagpatigayon sang mga aktibidad kun sa diin may pagtililipon ang mga kabataan kadungan sang coronavirus scare.
Sa interview sang Bombo Radyo kay Lea Belleza, public information officer sang DepEd Region 6, ginkompirmar sini nga temporaryo nga ginpostpone ang 2020 Regional Meet kaangot sang nagalapta nga 2019 novel coronavirus acute respiratory disease.
Suno sa iya, abiso ang Department of Health (DOH) nga likawan ang pagkadto sa madamo nga tawo kag suno sa iya, may yara sang 6,000 ka mga delegado kun madayon ang WVRAAM kalakip na ang mga atleta, coaches, technical officials kag mga ginikanan.
Suno sa iya, prayoridad gihapon ang seguridad sang mga pumuluyo ilabi na sang mga kabataan.
Kadungan sini, wala gina-engganyo sang DepEd ang iban pa gid nga mga aktibidad kaangay sang division competitions kag junior and senior prom.
Nagpahanumdom man ini nga padayon lang nga magmintinar sang maayo nga hygeine kaangay sang pagpanghugas sang kamot, paggamit sang sanitizer kag alcohol.
