Pagtimalos ang isa sa ginalantaw nga rasun sang kapulisan sa pagluthang-patay sa anay priso sa Public Market sang Brgy. Asia, sa banwa sang Hinoba-an, Negros Occidental, sang Setyembre 22.
Ang biktima ang ginkilala nga si Richard Alosiman, 33 anyos, residente sang Purok 11 sa nasambitan nga banwa.
Sa interview sang Bombo Radyo kay Police Major Jaynick Bermudez, hepe sang Hinoba-an Municipal Police Station, may person of interest na ang mga kapulisan sa pagluthang kay Alosiman kag isa sa ginatulok nila nga kabangdanan amo ang pagtimalos.
Ang suspect ang nakasuksuk sang bonnet kag hinali na lamang ginluthang si Alosiman nga naigo sa nawala nga bahin sang tiyan.
Ang suspetsado ang naghingagaw naman palagyo sakay sa motorsiklo.
Nahibaluan nga si Alosiman ang napriso sa kaso nga murder apang ini ang nakagwa sang Hulyo bangod may-ara sang natabo nga settlement.
Dugang pa ni Bermudez nga humalin sang makagwa sa prisohan ni Alosiman kaangay nga siya ang ginapanilagan na samtang may-ara naman sang naga offer sang trabaho sa biktima apang ini ang wala niya ginbaton.
Nagahulat na lamang ang kapulisan sang dugang nga witness agud nga mapadayon ang pagpasaka sang kaso batok sa suspetsado.
