BACOLOD CITY — Nagtalana na ang Land Transportation Office sang dayalogo sa natungdan nga mga grupo agud nga masolusyunan ang problema sa Bacolod Silay Airport Access Road (BSAAR) nga ginaparkingan sang mga truck sang tubo.
Ini ang kasunod sang reklamo sang mga motorista nga tuman kagutok ang Access Road bangud diri nagaparking ang mga truck nga nagahulat sang ila turno nga makapagaling sa First Farmers Holding Corporation kag sang reklamo man sang mga drivers sang truck nga gindakop kag ginmultahan sila sang LTO.
Suno kay LTO Bacolod head Renato Novero, magadayalogo siya sa mga planters sang tubo sa probinsya, mga drivers sang truck, sa pamunuan sang sugar central kag sa local government unit sang Talisay agud mahambalan ang solusyon sa problema.
Suno kay Novero, indi lamang mga motorista ang nagareklamo kundi pati ang mga residente sa lugar bangud indi na sila makasulod sa ila balay bangud sa obstruction sa dalan.
Aminado ang LTO head nga nabutang sila sa tunga-tunga bangud yara sa ila ang mandato nga ipatuman ang layi sa paggamit sang dalan.
