Ginalantaw sang Human Rights Lawyer nga ang mga rebelasyon ni former Iloilo City Police Office Director Police Lt Col. Jovie Espenido sa Congressional Hearing ang magaduso sa iban pa nga mangisog man nga magtestigo.
Sa Interview sang Bombo Radyo Bacolod kay Atty. Ceasar Beloria, ginalantaw sini nga nangisog si Espenido bangod may apat pa ka tuig nga administrasyon ni President Ferdinand ‘Bongbong’ Marcos Jr.
Madumduman nga sa affidavit ni Beloria, ginsaysay sini nga siya ang ginmanduan sa pagneutralize sang mga suspected drug personalities sa Duterte Administration, kag kalakip na sa options sini ang patay.
Apang ang Commission on Human Rights ang nakarecord sang madamo nga kaso sang mga makabig collateral damage sa maduguon nga war on drugs.
May ginbuyagyag man ini nga qouta system kag gina-angot kay former Presidenta Rodrigo Duterte, kun sa diin gintawag sini ang Philippine National Police nga pinakadako nga criminal syndicate sa Pilipinas.
Ginalantaw ni Beloria, nga mahimo nakonsensya na si Espenido kag agud indi malakip sa makasuhan, ginpili sini nga magtuad.
Sa karun, makabig pa lamang nga hearsay ang mga statement sang pulis kag magakinahanglan pa sang mabaskog nga mga ebidensya.
Apang nakita ni Beloria nga ang paggwa ni Espenido ang mangin giya naman para sa iban nga mangisog, kun makita nga protektado man sang gobyerno ang witness.
Samtang matuod man ukon indi ang alegasyon, ini ang makatrigger na sang dugang nga imbestigasyon sang House Quad Committee.
