Sa ginpatigayon nga meeting sang representative sang Land Transportation Franchising and Regulatory Board (LTFRB) Region 6 sa mga transport sector sa syudad sang Bacolod kag probinsya sang Negros Occidental kahapon, nagtuhaw ang alegasyon natuhoy sa masobra tres mil nga Pantawid Pasada Card nga yara sa paghinakop sang Regional Office apang wala ginpanagtag sa mga benepisyaryo sa Negros Occidental.
Suno kay Diego Malacad, Secretary General sa United Negros Drivers and Operators Center (UNDOC) nga nagreact man si House Minority Leader Joseph Stephen Paduano matapos nga maggwa ang mga gina-alegar kurapsyon sa ahensya may kaangtanan sa pagdistribute sang mga ayuda.
Suno kay Malacad, una nga nagdistribute sang ayuda sa mga kooperatiba kag korporasyon apang indi ang ginapatigayon lang nga patago kag wala sang ihibalo ang mga opisyales sa gobyerno.
Nahibaluan nga sa una nga tatlo ka tranche sang paghatag sang fuel subsidy sa mga jeepney drivers, halos one-third lang sa mga ini ang nakabatun.
Naglutaw man sa meeting ang alegasyon nga kun ang LTFRB Region 6 ang magbisita, ginalibre sang mga kooperatiba kag korporasyon ang ila nga plete sa barko, akomodasyon kag libre man ang mga babayi nga nagapakita lang madamo sang indi husto nga nagakatabo sa hanay sang ahensya.
Pahayag ni Malacad nga mismo si Congressman Paduano ang nagpahayag nga ipadangat sini sa House of Representative ang alegasyon agud nga mapamangkot kun diin nagkadti ang budget gikan sa General Appropriation Fund kag kun pila na ang drivers nga nakabatun.
Dugang pa nga ginpahayag sa meeting nga may kapin 3,000 pa nga mga Pantawid Pasada Card ang yara lang sa kamot sang LTFRB Region 6 kag wala napanghatag sa mga operators gani wala man makadangat sa mga drivers.
