Ginsuhestyon sang chairperson sa Committee on Senior Citizen sa Sangguniang Panlungsod sa Bacolod nga magtukod sang mobile satellite offices sa pagpanagtag sang mga Senior Citizen kag Person With Disability (PWD) IDs.
Sa interview sang Bombo Radyo Bacolod kay Councilor Celia Flor, ginduso sini kay Bacolod City Mayor Alfredo “Albee” Benitez nga magset sang schedule sa kada Barangay kag maghamtang na lamang sang mobile satellite site sa pagpanghatag sang Senior Citizen IDs agud nga mangin mas mahapos sa mga katigulangan.
Paathag sini nga mabudlay na para sa iban nga mga Senior Citizens partikular na ang mga may ginabatyag kag wala sang maga-alalay, nga magpadulong sa mall agud makakuha sang Senior Citizen ID.
Dugang pa nga madamo sang mga proseso kun sa diin ang mga seniors ang magakinahanglan pa nga magpabalik-balik.
Suno kay Flor, ang printer sang ciudad sa mga malls ang sarang lamang makacater sang 50 ka IDs kada adlaw, kag ini ang naga-init na.
Pahanumdom sang konsehal nga nagdangat sa masobra 40 mil ang Senior Citizen sa ciudad sang Bacolod, kag ini ang dugangan pa sang linibo man nga mga PWD.
Gani isa man sa ginahingyo sini nga makaprocure ang City Government sang printer nga may mas mataas nga capacity kag sarang makaprint sang linibo nga ID sa isa lamang ka adlaw.
