Ginakonekta sang Bacolod Police Station 10 ang mahimo nga mga suspetsado sa pagpanghold-up sa computer shop sa Zone 1, Barangay Handumanan, Bacolod City sang Martes sang kaagahon, sa mga suspetsado gikan sa iban pa nga mga kaangay nga insidente nga nagaluntad sa syudad sang Bacolod.
Sa interview sang Bombo Radyo Bacolod kay Police Captain Lelanie Lagoting, acting Station Commander sang Bacolod Police Station 10, padayun ang imbestigasyon sang ila imbestigador kag mga intelligence personnel.
Paathag sini nga sila ang may mga persons of interest na kag ginalink nila ang insidente sa asod-asod man nga hitabo sang pagpangawat sa syudad.
Ginalantaw nila ang posibilidad nga nagalumpat-lumpat lamang ang target nga area sang mga suspetsado sa syudad sang Bacolod.
Madumduman nga ala-1:58 sang kaagahon sang Martes, hinali na lamang ginsulod sang tatlo ka mga persona nga nakahelmet ang computer shop kag ginpangkapkapan ang mga yara sa sulod.
Nakuha sang mga ini ang cellphone kag P100 nga cash sang fish vendor nga Junemark Millado nga nagalantaw lamang sa iban nga mga naga-computer, kag amo man ang nagpablotter sa Police Station.
Ang insidente ang nakuha naman sa CCTV footage sang computer shop.
Sa paglantaw ni Lagoting, random lang ang pagsulod sang mga suspetsado bangod wala man sang dako nga target nga may dako nga makuha nga kantidad gikan sa mga yara sa computer shop, kag sila ang gilayon man nga naggwa kag nagsakay sa motorsiklo matapos ang pagpanghold-up.
Aminado ini nga zero crime rate sa masami ang Bacolod Police Station 10, kag karun lang nakarecord sang kaangay nga hitabo.
