Ginahulat na lamang nga maturn-over sang Department of Public Works and Highways (DPWH) sa Bacolod City ang Bacolod Negros Occidental Economic Highway (BANOCEH) agud maregulate kag makaplastar sang pagsulundan sa dalan.
Sa interview sang Bombo Radyo Bacolod kay Councilor Al Victor Espino, chairperson sang Committee on Transportation and Traffic sa Sangguniang Panlungsod, ginpadulungan sini mismo ang BANOCEH partikular na sa bahin sang Barangay Cabug nga may kapin 80 ka mga vendors.
Aminado si Espino nga ang mga ini ang ordinaryo lamang nga tawo nga nagapangabuhi, apang pahanumdom sang konsehal nga ang dalan ang dapat magserbe sang purpose bilang dalan.
Pahanumdom sini nga Bacolod Negros Occidental Economic Highway ang ginpangalan bangod ini ang ginhuman para sa economic purpose.
Gani sa tion nga maregulate na nila kag sa nasambitan nga dalan na magalabay ang dalagkoan nga mga salakyan, ginakahangaw-an ang posibilidad sang mga aksidente ilabi na nga madamo sang mga nagalagaw sa area.
Paathag ni Espino nga pag-abot sa regulasyon, ini ang salabton sang Sangguniang Panlungsod, ang local government unit man ang may responsibilidad sa pagpatuman.
Madumduman nga una na nga nagpahayag ang mga vendors nga sila ang willing man nga magbiya sa lugar kun pahalinon na, apang tubtob ginapahanugutan pa, sila ang magapadayun sa pagbaligya.
