Karun nga tuman kainit sang tiyempo, kalakip man sa ginatutukan ang paghatag pahanumdom sa mga evacuees sang Bulkan Kanlaon agud malikawan ang heat related illnesses.
Sa interview sang Bombo Radyo Bacolod kay Office of Civil Defense – Negros Island Region Director Donato Sermeno III, magluwas sa ila regular monitoring sa mga evacuation centers, ang incident management team ang nagapatigayon man sang information campaign angot sa extreme heat.
Sila ang may kolaborasyon sa iban pa nga mga ahensya sang gobyerno partikular na sa Department of Health, nga may programa nga “beat the heat”.
Kalakip diri ang mga klase sa sulod sang tent, agud malikawan nga mangin tuman ka init, kasubong man gin-abiso na nila nga untaton lang anay ang mga Volleyball tournaments sang La Castellana evacuees sa kasagsagan sang init.
Padayun ang pahanumdom sang mga ini kun paano malikawan ang heat exhaustion kag heat stroke.
Ang OCD-NIR ang nagakoordinar man gihapon sa OCD 6 kag OCD 7.
Sa karun ang may pinakamadamo nga evacuees amo ang La Castellana sa Negros Occidental nga yara pa sa masobra 1,300 ka pamilya kag 916 ka pamilya naman sa Canlaon City, Negros Oriental.
