Natumod sa follow up investigation sang Moises Padilla Municipal Police Stations nga may inconsistencies sa mga pahayag sang tiyo nga nagpahayag nga may nagsipa sa motorsiklo nga ginapungkuan sang iya hinablos gani ini ang nalampos kag napatay.
Madumduman nga una nag-ibwal ang balita sa kamatayon ni Deserie Tadena, 21 anyos, 3rd year student sa kurso nga Bachelor of Science in Elementary Education sa Central Philippine State University, matapos ginpahayag sang tiyo sini nga si Joear Bajar nga may KLX nga motorsiklo nga naglabay kag ginsipa ang motorsiklo samtang siya ang nagapangihi.
Sa interview sang Bombo Radyo Bacolod kay Police Lt Arnolfo Robles, deputy chief of Police sang Moises Padilla Municipal Police Station, ginalantaw nila nga selflicted ang aksidente.
Sila ang umpisa nga magduda sang naglainlain ang pahayag ni Bajar sa ila imbestigador.
Samtang sila ang nakakita naman sang witness, nga naga-alegar naka-overtake lamang sa duha sang matabo ang aksidente.
Suno sa witness, nakabati ini sang naglagapok kag sang iya ginbalikid, natumba na ang motorsiklo kag nagahakos ang tiyo sa iya hinablos.
Nagapati si Robles nga naghimo-himo lamang sang estorya ang tiyo agud matabunan nga siya ang naka-inom sang makahulubog nga ilimnon sang nagsugat sa hinablos.
Dugang pa nga ginpahayag sini nga sang matumba ang motorsiklo, ini ang nagwild kag gindusdos ang biktima.
Apang suno kay Robles, may clutch kag indi automatic ang motorsiklo gani apisar nga magsaka sa premiera ang kambyada, ini ang magabutyog lamang kag mapatay gani malayo nga ini ang nagwild.
Madumduman nga ang tiyo ang may mga bakiras man sa kamot, nga suno diri bangod sa pagpugong sini sa nagawild nga motorsiklo.
Bisan ang ginikanan sang biktima ang naga-ayo naman nga magsugid na sang matuod ang tiyo bangod kun nabatun naman nila nga aksidente ang natabo, kag wala sang plano nga magpasaka sang kaso
