Patay ang pahinante sang Refrigerated Van sa nahitabo nga Vehicle accident sa Osmeña Avenue, Barangay 5 siyudad sang Victorias, kahapon.
Ang driver sang Refrigerated Van amo si Gimbo Escordial kag ang pasahero sini amo si Junjun Milleza, 19 anyos lunsay mga residente sa siudad sang Cadiz.
Samtang ang driver naman sang Dump Truck amo si Francis Poral, 48 anyos residente sang Barangay 19, Victorias City kag ang mga pasahero sini amo sanday Ireneo Demapanag 29 anyos, Jun Art Advincula, 25 anyos kag Jilson Morgiya, 19 anyos, lunsay mga residente sang Barangay Nanca, EB Magalona.
Sa interview sang Bombo Radyo kay Police Captain Genus David, Deputy Chief sang Victorias City Police Station, ginpahayag sang mga witness nga nakita nila nga nagabalang-balang ang dalagan sang Refrigerated Van tubtob sa nabunggu-an sini ang sugata nga Dump Truck.
Gilayon man nga nagpatigayon sang rescue operation kun sa diin nahatagan na sang naga kaangay nga pagbulong ang driver sang truck kag Refrigerated Van kag out patient naman ang tatlo ka pasahero sang Dump Truck.
Apang wala nakasalbar kag napatay ang pahenante sang Refrigerated Van nga si Junjun Milleza.
Sa karun yara na sa kustodiya sang kapulisan ang driver sang Dump truck.
