Duha ang arestado sa ginpatigayon nga entrapment operation sang National Bureau of Investigation-Special Task Force (NBI-STF) sa pagrekober sang painting sang national artist nga ni Fernando Amorsolo nga ginkawat sa museum sa ciudad sang Silay.
Madumduman nga sang Hulyo 3 ginreport nga ginkawat ang 88 anyos nga “Mango Harvesters” painting nga nakadisplay sa Hofileña Museum sa Brgy 1, ciudad sang Silay, Negros Occidental.
Sa interview sang Bombo Radyo Bacolod kay Manuel Fayre, pinuno sang NBI-Bacolod District Office, nagpatigayon sang entrapment operation ang NBI-STF sang Hulyo 11, kapin alas-7:00 sang gab-i, sa Tomas Morato, Quezon City.
Suno diri, nakakuha sila sang impormasyon nga may certain “Atty. Ching” nga nagabaligya sang Amorsolo painting.
Arestado sanday Ritz Chona Ching kag Donecio Somaylo nga amo ang ginsugo ni Atty Ching nga magdeliver sang painting sa poseur-buyer sa balor nga P3.5 million.
Suno kay Fayre, indi pa makumpirmar kun ang duha ka naaresto sa Quezon City amo man ang duha nga nagkawat sang painting sa Silay City.
Magapangatubang sang kaso sa pagbayolar sa Presidential Decree 1612 ukon ang Anti-Fencing Law ang duha ka naaresto.
Samtang, dako naman ang pagpasalamat ni Silay City Mayor Joedith Gallego nga narekober na ang ginkawat nga Amorsolo painting.
