Opisyal na nga ginbuksan ang Provincial Meet ukon Palarong Panlalawigan sang Department of Education diri sa Negros Occidental subong nga hapon.
Ang opening ceremony ang ginpatigayon sa Panaad Park and Stadium.
Sa interview sang Bombo Radyo kay DepEd Division of Negros Occidental Public Information Officer Ian Arnold Arnaez, alas 2:30 nagsugod ang parada kag alas 3:00 sang hapon ang opening program.
Suno sa iya, napulo ka mga clusters kag napulo ka mga areas ang nagpakigbahin.
Ginapreparahan naman sang division ang tuman kainit nga tiyempo agud malikawan ang nagkalatabo sa Luzon kun sa diin may mga estudyante nga nagkalalipong bangud sa tuman ka init.
Gin-abisuhan man nila ang tanan nga participants nga mangin hydrated kag magdala sang kalo, payong ukon pantabon sa ulo kasubong man sang pagkaon.
Preparado kag available man ang ila medical team.
Gina-agda ni Arnaez ang publiko nga magtambong sa Provincial Meet samtang nagpanugyan man ini sa mga players nga maghampang nga may sportsmanship.
Ginplastar man kaina ang rules kag schedule sang games agud kun mag-actual na ang hampang, wala sang reklamo ang mga coaches.
Suno kay Provincial Meet Correspondent Leo Ceralbo, antes ang opening ceremony, gintalakay sa Bacolod City National High School ang Child Protection Policy.
Suno sa iya, may yara man sang medical team ang probinsya kag ciudad sang Bacolod.
May mga nakastandby naman nga mga ambulansya kag medical team.
