Nangin malinong kag masubo ang palibot sa England kasunod sang pagkapierde sang England sa Argentina sa semifinals sang FIFA World Cup 2026.
Sa interview sang Bombo Radyo Bacolod kay Ramil Isogon, Bombo International News Correspondent derekta sa England, abanse na kuntani ang England sa score nga 1-0 apang sa 15 minutos na lamang nga nabilin sa hampang, didto naman nakagoal sang duha ang Argentina.
Suno kay Isogon, madamo sang nagabasol sa manager sang team bangod sa hinali sini nga pagbaylo sang mga players sa pitch.
Pahayag sini nga yara na kuntani ang momentum sa England, apang sang gin islan ang mga players, nadula ang momentum kag ini naman ang gintake-advantage sang Argentina paagi sa agresibo nga mga pag-atake.
Suno kay Isogon, nagsuksok pa ini sang pin sang England bilang suporta gani heart breaking para sa mga English people ang kalutusan.
Ini bangod para sa ila, malapit nalang kuntani malab-ot ang handom nga liwat makuha ang kampeonato, apang naagaw pa sang kontra.
Nahibaluan nga ang England ang isa ka bes pa lamang nakakuha sang World Cup title, sadtong 1966.
Suno diri, kun nagdaog ang England, ginalauman na sini nga tuman ka gahod sa pungsod bangod sa mga celebration, apang matapos ang pagkapiede, ini ang nabuslan sang kalinong kag kasubo sang palibot.
Sa pihak sini, ginakabig ni Isogon nga Biggest Sporting Event in tha World ang FIFA World Cup 2026 ilabi na nga ang Top 4 sa FIFA Rankings amo ang naghampang sa finals.
Nahibaluan nga nagapanguna sa ranking ang France, ginasundan sang Argentina, Spain, kag England.
Ang England kag France ang magahampang pa para sa third-spot sa Sabado alas-5:00 sang hapon; samtang ang FIFA World Cup 2026 Finals sa tunga sang Argentina kag Spain sa Domingo, alas-3:00 sang hapon.
