Amat-amat na nga ginapanaog ang bangkay sang anom ka gina-alegar katapo sang New People’s Army (NPA) nga napatay sa engkwentro batok sa militar sa Barangay Gatuslao, Candoni, Negros Occidental kaina sang kaagahon.
Sa interview sang Bombo Radyo Bacolod kay Police Major Nelson Amsiwen, hepe sang Candoni Municipal Police Station, ang mga napatay ang lunsay lalaki kag yara sa 20 tubtob 40 anyos.
Paathag sini nga wala sang gin-evacuate kag wala sang kanselasyon sang klase sa nasambitan nga Barangay, bangod ang encounter site ang malayo sa pamalay kay yara na pribado nga Palm plantation sa boundary sang banwa sang Candoni kag Ilog.
Ginabanta yara sa 12 ang mga naka-engkwentro sang 15th kag 47th Infantry Battalion sang Philippine Army kun sa diin anom ang napatay makaligad sang 40 tubtob 50 minuto nga engkwentro.
Wala naman sang nasamaran sa bahin sang militar.
Ginatumod pa sa karun ang identity sang mga napatay kag kun may-ara sang high ranking officials.
Narecover man sa encounter site ang walo ka high powered firearms, granada, improvised explosive device kag duha ka rifle grenade.
May-ara man sila sang narecover nga gasolina, kag gina-imbestigaran pa ang posibilidad nga tuyo sunugon ang palm plantation bangod sila ang wala man sang dala nga motorsiklo.
