Magapasaka sang plete sumugod subong nga adlaw ang fast craft nga may byahe Bacolod-Iloilo vice versa nga ginatawag sang mga ini nga fuel subsidy.
Suno sa Chief Executive Officer (CEO) sang Metro Bacolod Chamber of Commerce and Industry (MBCCI) Frank Carbon nga Operator man sa Weesam Express, duha na ka semana nga nagsugod ang byahe sang fast craft kag nakita sang mga ini nga indi gid sila makabawi sa mataas nga gatong kag pagnubo sang pasahero gani nagpasaka sila sang P50 sa First Class, Tourist kag Economy.
Dugang pa sang negosyante nga nagdangat sa P48 ang pagsaka sang presyo sang krudo gani indi sila makabawi kun magapabilin ang orihinal nila nga sukot.
Paathag ni Carbon nga sadto, ang maximum nga mapasakay sa mga fast craft ang yara sa 250, apang karun nga may COVID-19 pandemic nagapabilin nalang ini sa 100 tubtob 150.
Santo sa fair rate sang Weesam Express, ang regular nga mga pasahero sa first class ang magabayad sang P500 para sa one way samtang P1,000 naman sa round trip.
Sa pihak nga bahin ang mga student kag senior citizens ang pagasukton sang P415 samtang ang minor nga edad 4 tubtob 11 anyos ang magabayad sang P285.
Sa mga estudyante, required naman nga magpakita sang School ID samtang birth certificate naman sa mga wala pa naga-eskwela.
Pasalig naman ni Carbon nga wala sang plete ang mga lapsag.
Samtang mangin P425 naman ang regular rate sa Tourist ukon P850 sa round trip.
Ang student kag senior citizens ang may plete nga P355 samtang ang edad 4 tubtob 11 anyos ang may plete nga P250.
Samtang sa Economy naman nga non-aircon, ang regular nga plete ang mangin P400 ukon P800 para sa round trip.
Ang student kag senior citizen ang may plete nga P355 samtang ang mga minors nga 4 tubtob 11 anyos ang may plete nga P235.
