Nagsaka sang P25 ang plete sa Weesam Express bangud sa nagapadayon nga pagsaka sang presyo sang gatong.
Suno kay Metro Bacolod Chamber of Commerce and Industry (MBCCI) Chief Executive Officer Frank Carbon, nagdugang ang plete sa Weesam Express bangud malapit na lamang sa P100 ang presyo sang gatong samtang nagasaka naman ang presyo sang pagkaon kag mga balaklon.
Sa karun ang plete sa non-aircon ang yara sa P400; P500 naman sa tourist kag may aircon; samtang P600 sa first class.
Humalin kahapon, suspendido ang byahe sang Weesam Express bangud ginpaidalum sa maintenance ang barko.
Suno kay Carbon, ang barko ang pagadal-on sa isa ka repair shop sa Iloilo kag pagatsekyaron ang mga makina, generators, life jackets kag mga equipment sini agud masiguro nga ini ang seaworthy.
Suno sa iya, pagkatapos sang inspection sang mga engineers kag kun macertify na sang Philippine Coast Guard ang barko, sarang na ini nga makabalik sa pagbyahe sa adlaw sang Biyernes.
