Nagapanawagan sang pangamuyo kag suporta ang pamilya sang pambato sang Pilipinas para sa 71st Miss World coronation night sa Jio World Convention Centre sa Mumbai, India alas-10:00 karun sa gab-i, oras sa Pilipinas.
Ang kandidata nga magatiglawas para sa Pilipinas amo si Gwendolyne Fourniol, nga tumandok sang ciudad sang Himamaylan, probinsya sang Negros Occidental.
Makasumpong sini sa pageant ang 111 ka iban pa nga mga matahom nga kandidata gikan sa nagkalainlain nga pungsod.
Ang iloy sini amo si Sim Fourniol nga isa ka Pilipina samtang ang amay naman sini amo si Thierry Fourniol nga isa ka French national.
Sa interview sang Bombo Radyo Bacolod kay Sim Fourniol, ginpanawagan sini ang pangamuyo kag pagsuporta para sa iya nga bata.
Suno diri, si Gwendolyne ang nagpasakop agud maghatag sang bugal para sa Pilipinas kag indi lamang sa bangod sa personal nga rasun.
Samtang ang focus kag goal naman sini sa pagrepresentar amo ang foundation nga iya ginatrabaho para sa accessible quality education.
Maisog kag mabaskog naman ang pagkakilala sini sa iya nga bata, kag nagapati ang iloy nga himuon sini ang best para sa Pilipinas.
Apang aminado ini nga matahom man kag maalam ang kasumpong nga kandidata sang nagkalainlain nga pungsod, gani dako nga bulig para sa ila ang pangamuyo kag pagsuporta sang mga Pilipino.
Sa pihak nga bahin, proud naman ang duha ka utod ni Gwendolyne nga mataas na ang nalab-ot sini.
Sa interview sang Bombo Radyo Bacolod kay Pierre Alexandre Fournoil kag Yann-Luc Fournoil, ano man ang mangin resulta, sila ang magapabilin nga proud kay Gwendolyne.
Suno diri duha ka semana naman nga nagapreparar ang kandidata kag ini ang fit physically kag mentally sharp, samtang bilog nila nga pamilya ang magalantaw gid sa coronation night karun sa gab-i.
Hugot ang mga ini nga nagapati nga madaog sang ila utod ang corona para sa Miss World 2023.
