Ginakalipay sang pamilya Balagusa ang pagpanawagan ni Bacolod City Mayor Alfredo “Albee” Benitez sa suspect sa pagpatay sa ila bata nga si Nicus Balagusa nga magsungka na; apang panawagan sang mga ini nga sila ang hatagan sang seguridad.
Madumduman nga ginluthang patay ni Carlito “Dondon” Tongho si Nicus sa sulod mismo sang kwarto sini kun sa diin yara man ang iya mga ginikanan.
Apang nahibaluan nga si Nicus ang wala man nalakip sa mga gina-alegar naghimulos sa 16 anyos nga bata nga babayi sang suspect.
Kahapon, nagpanawagan ang alkalde sa suspect sa pagpatay nga atubangon ang iya krimen, kasubong man nagpanawagan sa 17 anyos kag 19 anyos nga suspect sa pagpanghimulos nga magsungka man.
Si Tongho ang may gina-alegar apat ka iban pa nga kaupdanan nga nagserbe nga look-out sang ginhimo sini ang pagpangluthang.
Sa interview sang Bombo Radyo Bacolod kay Eric Balagusa, amay sang biktima, ginakalipay nila ang pagbulig sang alkalde sa pagpanawagan sa pagsungka sang mga suspetsado, apang pangabay man sang mga ini nga ihatag ang ginpromisa nga seguruhon ang ila seguridad.
Ini bangod sa haya sang biktima, may namutikan nga nagabalik-balik nga nakamotorsiklo, nga gilayon nagpalagyo sang gin-usisa kun ano ang tinutuyo.
Bangod sini nagaka-alarma naman ang pamilya sa ila kahilwayan.
Paathag sang amay nga sa karun, wala pagid nila mabatyagan nga sila ang luwas.
Pangabay man sini nga hikuton sang Ginoo ang tagipusuon sang mga suspect agud nga sila ang magsungka na.
