Ginpasalamatan sang mga utod ni Leah Mosquera ang tanan nga mga nagpangamuyo kag nagbulig agud makapauli ang bangkay sang ila utod nga napatay sa Israel.
Sa interview sang Bombo Radyo Bacolod kay Donna Mosquera, ika-apat sa siyam ka mag-utod kag magulang ni Leah, ginpasalamatan sini ang tanan nga nagpangamuyo kag nagpangamusta sa 28 ka adlaw nga nagtinir sa ospital ang ila utod.
Si Donna ang anay overseas Filipino worker man sa Israel, apang madugay na nga nagbalik sa Pilipinas, kag sa nahibaluan sini internal ang injuries ni Leah matapos nga ini ang natampukan sang debris sang mawasak ang ila apartment bangod sa missile sang Iran.
Ginpasalamatan man sini ang tanan nga nagbulig agud makapauli ang bangkay sang iya manghod kaangay sang Department of Migrant Workers, Overseas Workers Welfare Administration, Governor Eugenio Jose “Bong” Lacson kag iban pa, nga nagsabat man sang burial kag funeral assistance gani nabuhinan ang ila problema.
Estoryahan pa nila nga mag-ulutod kun tubtob san-o igahaya ang bangkay ni Leah.
Samtang medyo nakaginhawa na ang manghod ni Leah Mosquera nga kaupod sini sa Israel karun nga napauli na nila sa ila balay ang bangkay sang iya utod.
Sa interview sang Bombo Radyo Bacolod kay May Joy Mosquera, tuman ka buot ang pagkakilala sini sa iya magulang kag masinadyahon.
Nagapanghagad pa ini nga sila ang magtravel sa iban nga mga pungsod, apang kaangay nga indi sini mabiyaan ang iya amo nga maayo man ang pagtratar sa iya.
Samtang emosyonal man ang mga hinablos nga ginapa-eskwela ni Leah.
Sa interview sang Bombo Radyo Bacolod kay Carlyn, manug 2nd year college, dako ang pagpasalamat sini sa iya tiya.
Pahayag pa niya nga one call away lamang si Leah kun sila ang may kinahanglan.
Aminado ini nga lima ukon anom ka tuig na ang ulihi nila nga pagkit-anay sang magpauli ang tiya, apang ini ang halos adlaw-adlaw man nga nagatawag.
Nagatulo naman ang luha sang Grade 10 student nga si RJ samtang ginapasakamatan ang pagpa-eskwela sa ila sang iya tiya kag nagpasalig nga indi nila ini makalipatan.
