Masobra sa 5,000 ka pamilya ang apektado sa nagluntad nga mataas nga pagbaha sa Brgy Singcang, Bacolod City kahapon.
Sa interview kay Punong Brgy Rosinie Distrito, ila ginkakibot nga tuman ka taas sang baha nga nagluntad kun sa diin iban sa mga pumuluyo wala na natigayon pa nga marescue kag nagtinir na lang sa ibabaw sang atop sang ila balay, sa atop sang covered court kag sa mga simbahan.
Suno diri, may reported nga may nagkalagub-an sang balay kag mga negosyo kag madamo gid sang nagub-an sang gamit.
Sang nagsubside na ang tubig, nagpauli na ang mga residente kag nagpanghimos sang ila mga balay.
Nakapadala naman sang foodpacks sanday Bacolod City Mayor Greg Gasataya kag Bacolod City Lone District Congressman Alfredo Benitez.
Pahayag ni Distrito, ang mga gamit, balay kag negosyo mahimo nga makita sa liwat apang ang kabuhi sang tawo isa gid lamang, amo nga dako ang iya pagpasalamat nga wala sang may napatay.
