Ginpahayag sang nag-rank 9 sa 2024 Guidance Counselor Licensure Examination nga nangin inspirasyon sini ang iya pamilya para magtuon sang husto.
Sa intertiview sang Bombo Radyo kay Dr Ma May Flor Sentina, wala sini ginalauman nga makapasar sa licensure examination ilabi na nga makasulod sa Top 10.
Suno diri, nagatrabaho ini samtang nagareview nga kun kaisa may mga tion nga nagakatulogan ini apang iya gid ginabalikan ang mga topiko agud nga matun-an.
Gin-athag man sini nga wala sang dapat nga ikahadlok kun magpalapit sa guidance counselor bangod lain ang ginatawag nga disiplina kag counseling.
Dugang pa sini, bisan sila nga mga guidance counselor nagapangayo man kun kaisa sang bulig sa iban para mas maathagan ang etudyante.
Ginpanawagan man ni Sentina dapat may yara sang maayo nga relasyon sa tunga sang estudyante kag guidance counselor agud nga mas maingganyo ang mga kabataan nga magpalapit kag mangayo sang bulig.
Si Sentina ang naggradwar sa University of St. La Salle sa degree nga Bachelor of Arts (AB) in Psychology, nagkuha ini sang master’s degree sa University of Negros Occidental – Recoletos kag nagkuha sang PhD sa Philippine Normal University – Manila.
Sa karun, siya ang nagatudlo kag nagatrabaho sa guidance office sa Philippine Normal University – Visayas, sa ciudad sang Cadiz.
Pahayag ni Sentina, nangin inspirasyon sini ang iya hinablos nga luyag magsunod sa iya bilang isa ka Guidance Counselor.
